strømlinjebåtar.
Arbeidsstyrken var i dei travlaste tidene, nett etter andre verdskrigen, på meir enn 20 skipstømmermenn. I tillegg kom stålarbeidarane som var tilsette i sagvåg Sveis, eit underselskap av treskipsbyggeriet.

Det var brørne Fredrik Aasheim og Bernt Valvatne, og eldste son til Fredrik, Asbjørn, som tok til med båtbygging på Eriksøyro. Dei hadde i mange år vore i arbeid hos Ottesen på Jensaneset, og hadde lært fartøybyggjarfaget der.

Skipsbyggeriet bygde fleire motorkutterar, på kring 60 fot. Den eine av kutterane, «Havørn», vart rekvirert av dei allierte under krigen, og nytta i Nordsjø-trafikken. Mellom anna deltok han i det såkalte Lofot-raidet, julehelga 1941.

Forutan småreparasjonar av stålskip, hadde dei fleire ombyggingar, som gav mykje arbeid. Mellom anna vart lastebåten «Sagvaag» ferdig ombygt i 1948. Skipet vart landskjent i 1946 då det eksploderte i karbidfart, og heile mannskapet på ni omkom.

Utetter 1950-åra vart det verre og verre å skaffa høveleg arbeid til skipsbyggeriet, og i 1953 slutta verksemda av. I dag er det to av sønene til Asbjørn Aasheim som driv båthamn på Eriksøyro, med slipp, oppstillingsplass og butikksal.